热天里个一日，一位捷克朋友发拨我一张照片。勒花园里个小台子浪向，摆勒两杯自家做个提拉米苏。初一看，像煞是两只小花盆。白颜色个瓦楞杯里向，提拉米苏浪厚 厚叫个洒勒一层咖啡色个粉末，上头还摆了半只剖面朝天、带绿叶个草莓，莓芯个纹理像发光个火炬。一般比较厚并且全覆盖点心个，多数是巧克力粉；而撒粉像毛毛雨个，基本浪是可可粉。数量取决于味蕾，甜多则苦少。

　　对我来讲，提拉米苏搭慕斯个味道差勿多。一勺进口，甜苦交织，滑润柔软，奶味浓郁，芝士香伴酒香。勿同个是，提拉米苏个酒搭咖啡味道更加突出。伊需要冷藏三四个钟头之后再好吃，实在是大热天里个一道好西点。

　　提拉米苏（Tiramisu）是一款意大利经典甜点，几乎成了意国甜品个代名词。主要原料有：朗姆酒、浓咖啡Espresso、马斯卡彭干酪（Mascarpone）、手指饼干（Lady Finger）搭仔可可粉。由一层浸透浓咖啡搭朗姆酒个手指饼干，一层混合了蛋黄搭糖个马斯卡彭干酪糊，一层手指饼干搭蛋黄糊；层层叠加而成。有人讲，做提拉米苏可以用白兰地、咖啡酒或者西西里个马尔萨拉葡萄酒，我个意大利朋友强调：“一定要摆朗姆酒，严格讲是呒没其他口味个。”

　　做提拉米苏个材料勿复杂却有来头。手指饼干相传出自15世纪意大利萨沃伊皇室御厨个创新，白色软干酪马斯卡彭起源16世纪末意大利伦巴第。顺便讲一句，有眼食材还搭伊个名字有关唻：外国拆字先生拿Tiramisu拆开来解释：Tira（提拉）+mi（我）+su（往上）个意思为：“拉我起来”、“带我走”搭“让我打起精神”咾啥。可以起搿眼作用个，就是提拉米苏当中个浓咖啡Espresso搭可可粉。附带再讲一句，名字由来个另外一种说法，是从意大利威内托大区方言Tiramesù（提拉米塞）演变成Tiramisù。

　　前年，我从佛罗伦萨到托斯卡纳个中世纪贸易搭金融中心锡耶纳去。游走城里，勒四个地方看到罗马狼孩个雕塑。相传母狼喂养了一对男婴，伊拉长大以后复仇、夺回了王位并建立了罗马。

　　迭个地方也有一个关于提拉米苏个传说。来锡耶纳个托斯卡纳执政最长个统治者科西莫三世·德·美第奇（Cosimo III de Medici ），特别欢喜当地一种糊状个甜点，人称“公爵个甜羹”，伊就是提拉米苏个前身。

　　之后，搿位大公拿搿甜点带回到托斯卡纳个首府佛罗伦萨。不过，威尼斯搭特雷维索却认为提拉米苏是伊拉个传统甜点，一个讲诞生于上世纪60年代个威尼斯，一个勒《VinVeneto》杂志发表文章：特雷维索个Alle Beccherie餐厅老板娘阿尔芭·坎皮奥勒1971年开发了伊。

　　除了搿起皇家版，还有两个版本：先看战争版：讲有个妻子，为出征个丈夫准备干粮，因为屋里比较贫穷，就拿所有个饼干面包、蛋糕奶酪搭咖啡混合成功一只糕点，取名提拉米苏。搿倒也契合提拉米苏含有“带我走”个意思，但不过带走个勿止是食物，还有屋里人个眷恋搭亲情。

　　讲起来也是化腐朽为神奇，拿隔夜饭变成功扬州炒饭；伊搭同是欧洲个芬兰鲁内伯里小蛋糕有异曲同工之妙。芬兰著名诗人鲁内伯里手头比较紧，伊个妻子就开动脑筋“螺蛳壳里做道场”：勒面团里向摆进去剩面包搭碎蛋糕，再倒一点潘趣酒，蛋糕成型之后，最后摆上自家种个水果。

　　再讲爱情版。有个男生爱上了一个女生。男生用心做了只蛋糕，取名“提拉米苏个爱”。女生勒蛋糕里品尝到了爱，乃么两家头牵手成功。有“带我走”意思个提拉米苏，成为了表达爱情个一个神器。

　　大器晚成个提拉米苏，走红于上世纪80年代中期。一位上世纪80年代就做意中贸易个意大利朋友告诉我，2000年前个上海，是呒没提拉米苏个。难怪翻遍《上海市场大观》（1981）、《上海特产风味指南》（1982），以及分别记载到1992年搭2000年个《上海饮食服务业志 》搭《上海通志·商业服务业卷》；侪杳无踪迹。

　　记得迭个辰光去天鹅阁，虽然勿晓得必胜客是啥个物事，却可以吃到5元一只个匹萨，但呒没提拉米苏。据一个“老克勒”告知：上海早些年还有更加纯正个意式餐厅，就勒复兴中路东华体育会足球场（今上交音乐厅）个对面；由“二战”之后滞留上海个一位意大利船员经营，从厨师到服务生侪是意大利人。伊只记得意面、意式肉肠搭番茄烩海鲜咾啥是与众勿同，没看见过提拉米苏。

　　好饭勿怕夜，走红勿怕黯；搿就是我吃提拉米苏吃出个滋味。现在足勿出沪，就好吃到巴黎始于1893年个百年老店MCAKE个沙布蕾芭菲搭咖之交响，搿西点双姝，是法国人对提拉米苏个发扬光大。

　　迪蒙，启迪蒙昧者也。上海市人。原上海大学中文系教师，多年来一直致力于沪语和海派文化的传承。

　　沪语是吴方言的代表方言，是吴侬软语的典范。她既可以用来拉家常，也同样可以用来朗读各类诗歌散文。

　　沪语完全可以书写，同粤语可以写作是一样的。本平台所有文章都是经过改写后，用沪语来演绎的，汉字书写也是正确的。